^ жоғары
 
Негiзгi бет А А А
Арнайы нұсқа
Қаз Рус Eng   
 
     
 

 
 
Дүйсенбі, 25 қыркүйек 2017
 
     
 
Әлеуметтік сала / Әлеуметтік қорғау
Беттер: 1 2 »

 

 

 

Әлеуметтік көмек көрсету:

Атаулы әлеуметтік көмек

Қазақстан Республикасының 2001 жылғы 17 шілдедегі № 246-II «Мемлекеттік атаулы әлеуметтік көмек» туралы Заңына сәйкес отбасының жан басына шаққандағы орташа айлық табысы белгіленген кедейлік шегінен төмен отбасыларға атаулы әлеуметтік көмек көрсетіледі. Кедейлік шегі әр тоқсан сайын ҚР Еңбек және халықты әлеуметтік қорғау министрлігінің бұйрығымен бекітіледі және нақты аймақтағы ең төменгі күнкөріс деңгейінің 40 %-ын құрайды. Алматы қаласы бойынша 2017 жылдың 1 тоқсанына күнкөріс деңгейі 24 619 теңгені, кедейлік шегі – 9 848 теңгені құрайды. Атаулы әлеуметтік көмекті рәсімдеу үшін өтініш беруші белгіленген үлгіде өтініш жолдайды. Өтінішке мынадай құжаттар қоса тіркеледі:

1) отбасы құрамы туралы мәліметтер;

2) адамның (өтініш берушінің отбасы мүшелерінің) тапқан табысы туралы мәліметтер;

3) жеке қосалқы шаруашылығының бар-жоғы туралы мәліметтер;

4) жұмыспен қамтуға жәрдемдесудің белсенді шараларына қатысқан жағдайда, әлеуметтік келісімшарттың көшірмесі;

5) өтініш берушінің (отбасы мүшелерінің) тұрғылықты жері бойынша тіркелгенін растайтын құжаттың көшірмесі.

Аталған көмекті алу үшін құжаттарды баламалы түрде Басқарманың аудандық бөлімдеріне немесе аудандық «Азаматтарға арналған үкімет» мемлекеттік корпарациясы» коммерциялық емес акционерлік қоғамның филиалы - Халыққа қызмет көрсету орталығына тапсыруға болады.

18 жасқа дейінгі балалары бар отбасыларға берілетін жәрдемақы

Қазақстан Республикасының 2005 жылғы 28 маусымдағы № 63-III «Балалы отбасыларға берілетін мемлекеттік жәрдемақылар туралы» Заңына сәйкес, 18 жасқа дейінгі балалары бар отбасыларға жәрдемақы тағайындау мен төлемін жүргізеді. 18 жасқа дейінгі балалары бар отбасыларға жәрдемақы, отбасының орта есеппен жан басына шаққандағы табысы азық-түлік себетінің құнынан төмен болған жағдайда тағайындалады. Азық-түлік себетінің құны ең төменгі күнкөріс деңгейінің 60 %-ын құрайды. Алматы қаласы бойынша 2016 жылдың 4 тоқсанына күнкөріс деңгейі 24 619 теңгені, азық-түлік себетінің құны– 14 771 теңгені құрайды. Аталған жәрдемақының мөлшері 1,05 айлық есептік көрсеткішті құрайды немесе әр балаға 2 382 теңге.

18 жасқа дейінгі балалары бар отбасыларға берілетін жәрдемақыны рәсімдеу үшін мынадай құжаттар қажет:

1) белгіленген үлгідегі өтініш;

2) баланың (балалардың) тууы туралы куәлігінің (куәліктерінің) көшірмесі (көшірмелері) не тууы туралы акт жазбасының (жазбаларының) көшірмесі (көшірмелері);

3) өтініш берушінің жеке басын куәландыратын құжаттың көшірмесі;

4) отбасының тұрғылықты жерін растайтын құжаттың көшірмесі (азаматтарды тіркеу кітабының көшірмесі не мекенжай бюросының анықтамасы, не ауылдық (селолық) округ әкімінің анықтамасы);

5) отбасының құрамы туралы мәлімет;

6) отбасы мүшелерінің табысы туралы мәлімет.

Аталған көмекті алу үшін құжаттарды баламалы түрде Басқарманың аудандық бөлімдеріне немесе аудандық «Азаматтарға арналған үкімет» мемлекеттік корпарациясы» коммерциялық емес акционерлік қоғамның филиалы - Халыққа қызмет көрсету орталығына тапсыруға болады.

Мұқтаж азаматтардың жекелеген санаттарына көрсетілетін әлеуметтік көмек

Қазақстан Республикасы Үкіметінің 2013 жылғы 21 мамырдағы № 504 «Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың үлгілік қағидаларын бекіту туралы» қаулысына, Алматы қаласы мәслихатының 2015 жылғы 23 шілдедегі № 347 «Алматы қаласында әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы», 2016 жылғы 16 қыркүйектегі № 32 «Әлеуметтік көмектің мөлшерлерін белгілеу және мұқтаж азаматтардың жекелеген санаттарының тізбесін айқындау туралы» шешімдеріне (бұдан әрі – шешімдер) сәйкес, Алматы қаласы бойынша келесі әлеуметтік көмектер көрсетіледі:

1. Жарты жылда бір рет көрсетілетін мөлшері7 айлық есептік көрсеткішті құрайтын (немесе 15 883 теңге) әлеуметтік көмек жан басына шаққандағы орташа табысы күн көріс деңгейінің 3 есе мөлшерінен аспайтын азаматтардың келесі санаттарына көрсетіледі:

арнайы мемлекеттік жәрдемақы алмайтын зейнет жасына жеткен зейнеткерлерге;

арнайы мемлекеттік жәрдемақы алмайтын, бірақ жас ерекшелігі бойынша мемлекеттік әлеуметтік жәрдемақы алатындарға;

бүйректің жеткіліксіздігі созылмалы ауруы бар бірінші топтағы мүгедектерге;

Ұлы Отан соғысы жылдарында тылдағы қажырлы еңбегі және мінсіз жауынгерлік қызметі үшін бұрынғы Кеңестік Социалистік Республикалар Одағы ордендерімен және медальдарымен марапатталған тұлғаларға, 1941 жылдың 22 маусымы мен 1945 жылдың 9 мамыры аралығында кем дегенде алты ай еңбек еткен (қызмет атқарған) және Ұлы Отан соғысы жылдарында тылдағы қажырлы еңбегі және мінсіз жауынгерлік қызметі үшін бұрынғы Кеңестік Социалистік Республикалар Одағы ордендерімен және медальдарымен марапатталмаған және аталған санат бойынша арнайы мемлекеттік жәрдемақы алатын тұлғаларға.

2. Әлеуметтік көмек ай сайын 5,5 айлық есептік көрсеткіш (12 479 теңге) мөлшерінде келесі санаттағы азаматтарға көрсетіледі:

Ұлы Отан соғысының қатысушылары мен мүгедектеріне;

Ұлы Отан соғысында қаза тапқан (қайтыс болған, хабарсыз кеткен) жауынгерлердің екінші рет некеге тұрмаған жесірлеріне;

Ауғанстандағы соғыс қимылдары кезінде қаза тапқан (хабарсыз кеткен) немесе жаралану, контузия алу, мертігу, аурудың салдарынан қайтыс болған әскери қызметшілердің ата-аналарына, зайыбына (жұбайы);

3. Өрттің немесе табиғи зілзаланың салдарынан зардап шеккен азаматтарға ақшалай төлемдер түрінде әлеуметтік көмек баспанасынан айрылғанда, бүлінгенде, елеулі зиян келгенде отбасына 100 айлық есептік көрсеткішке дейінгі мөлшерлерде көрсетіледі. Әлеуметтік көмек төтенше жағдай туындаған күннен бастап алты айдан кешіктірілмей көрсетіледі;

4. Жан басына шаққанда орташа табысы күн көріс деңгейінің екі есе мөлшерінен аспайтын отбасыларға (азаматтарға) жылына бір рет әлеуметтік көмек 7,5 айлық есептік көрсеткіш (17 018 теңге) мөлшеріндекөрсетіледі;

5. Үлгілік қағида мен шешімдерге сәйкес ыстық және (немесе) суық сумен жабдықтаудың жеке есептеуіш құралдарын сатып алу, орнату немесе тексеруден өткізу шығындарын өтеуге арналған әлеуметтік көмек жан басына шаққанда орташа табысы күнкөріс деңгейінің үш есе мөлшерінен аспайтын төменде көрсетілген азаматтарға бір құрал үшін 2 айлық есептік көрсеткіш мөлшерінен аспайтын көлемде көрсетіледі:

1) мемлекеттік атаулы әлеуметтік көмек және (немесе) тұрғын үй көмегін алатын тұрмыс жағдайы төмен азаматтарға (отбасыларға);

2) бірге тұратын төрт немесе одан да көп кәмелет жасына толмаған балалары бар көпбалалы отбасыларына;

3) бірінші, екінші және үшінші топтағы мүгедектерге;

4) зейнет жасына жеткен зейнеткерлерге.

Әлеуметтік көмектің аталған түрі 2013 жылдың 1 тамызынан бастап ыстық және (немесе) суық сумен жабдықтаудың сатып алынған, орнатылған немесе тексеруден өткізілген жеке есепке алу құралдарына көрсетіледі.

Жоғарыда аталған әлеуметтік көмекті алу үшін өтініш білдіруші тіркелген мекен-жайы бойынша аудандық бөліміне келесі құжаттармен бірге өтініш толтырады:

1) жеке басын куәландыратын құжат;

2) тұрақты тұрғылықты жері бойынша тіркелгенін растайтын құжат;

3) адамның (отбасының) құрамы туралы мәліметтерді;

4) адамның (отбасы мүшелерінің) табыстары туралы мәліметтер;

5) өмірлік қиын жағдайдың туындағанын растайтын құжаттар.

6. Әлеуметтік көмек емдеудің амбулаториялық кезеңінде жүрген және туберкулезге қарсы күрес диспансерінде диспансерлік есепте тұрған туберкулезбен науқас азаматтарға жыл сайын 7 (немесе 15 883 теңге) айлық есептік көрсеткіш мөлшерінде ай сайын төлеумен тағайындалады.

Жоғарыда аталған әлеуметтік көмекті алу үшін өтініш білдіруші тіркелген мекен-жайы бойынша аудандық бөліміне келесі құжаттармен бірге өтініш толтырады:

1) жеке басын куәландыратын құжат;

2) тұрақты тұрғылықты жері бойынша тіркелгенін растайтын құжат;

3) адамның (отбасының) құрамы туралы мәліметтерді;

4) адамның (отбасы мүшелерінің) табыстары туралы мәліметтер;

5) өмірлік қиын жағдайдың туындағанын растайтын құжаттар.

Тұрғын үй көмегі

Алматы қаласында тұрақты тұратын және тіркелген аз қамтылған азаматтарға тұрғын үйді (тұрғын ғимаратты) күтіп-ұстауға жұмсалатын шығыстарды, ағымдағы тұрғын үй коммуналдық қызметтерді, телекоммуникация желісіне қосылған телефонға абоненттік төлемақының өсуі бөлігінде байланыс қызметтерін, жергілікті атқарушы орган жеке тұрғын үй қорынан жалға алған тұрғын үй-жайды пайдаланғаны үшін жалға алу төлемақысын, тәулік уақыты бойынша электр энергиясының шығынын саралап есепке алатын және бақылайтын, дәлдік сыныбы 1-ден төмен емес электр энергиясын бір фазалық есептеуіштің құнын өтеу үшін V сайланған Алматы қаласы мәслихатының XXVІІ сессиясының 2014 жылғы 2 маусымдағы № 232 шешімімен бекітілген Алматы қаласындағы тұрғын үй көмегінің мөлшерін анықтау және көрсету Ережесінің негізінде тұрғын үй көмегі көрсетіледі. Бұл көмек жоғарыда аталған қызметтерді төлеуге арналған шығындар отбасы бюджетінің жалпы табысының 10 пайыздық үлесінен асатын жағдайда көрсетіледі.

Тұрғын үй көмегін тағайындау үшін отбасы (азамат) аудандық «Азаматтарға арналған үкімет» мемлекеттік корпарациясы» коммерциялық емес акционерлік қоғамның филиалы- Халыққа қызмет көрсету орталығына өтініш береді және мынадай құжаттарды ұсынады:

1) өтініш берушінің жеке басын куәландыратын құжаттың көшірмесі;

2) тұрғын үйге құқық беретін құжаттың көшірмесі;

3) өтініш берушінің тұрғылықты тұратын жері бойынша тіркелгенін растайтын азаматтарды тіркеу кітабының көшірмесі немесе мекенжай анықтамасы;

4) отбасының табысын растайтын құжаттар. Тұрғын үй көмегін алуға үміткер отбасының (Қазақстан Республикасы азаматының) жиынтық табысын есептеу тәртібін тұрғын үй қатынастары саласындағы уәкілетті орган белгілейді;

5) тұрғын үйді (тұрғын ғимаратты) күтіп-ұстауға арналған ай сайынғы жарналардың мөлшері туралы шоттың көшірмесі;

6) коммуналдық қызметтерді тұтынуға арналған шоттың көшірмесі;

7) телекоммуникация қызметтеріне арналған түбіртек-шот немесе байланыс қызметтерін көрсетуге арналған шарттың көшірмесі;

8) жеке тұрғын үй қорынан жергілікті атқарушы орган жалдаған тұрғын үйді пайдаланғаны үшін жергілікті атқарушы орган берген жалдау ақысының мөлшері туралы шоттың көшірмесі;

9) жекешелендірілген тұрғын үй-жайларда (пәтерлерде), жеке тұрғын үйде тұратындарға тәулік уақыты бойынша электр энергиясының шығынын саралап есепке алатын және бақылайтын, дәлдік сыныбы 1-ден төмен емес электр энергиясын бір фазалық есептеуіштің құнын төлеуге қолданылатын түбіртек-шоттың көшірмесі.

Үйде оқытылатын мүгедек балалардың отбасыларына берілетін жәрдемақы

Алматы қаласы мәслихатының 2013 жылғы 19 желтоқсанындағы № 196 «Мүгедектер қатарындағы кемтар балаларды жеке оқыту жоспары бойынша үйде жұмсаған шығындарын өндіріп алу туралы» шешіміне (бұдан әрі – Шешім) сәйкес кемтар балаларды жеке оқыту жоспары бойынша үйде жұмсаған шығындарын өндіру үшін жергілікті бюджет есебінен тоқсанына 6,5 айлық есептік көрсеткіш (14 749 теңге) мөлшерінде әлеуметтік көмек төленеді.

Шешімнің 7 тармағына сәйкес әлеуметтік көмек тоқсан сайын ағымдағы тоқсанның соңғы айында келесі құжаттар негізінде төленеді:

1) алушының жеке басын куәландыратын құжаты;

2) баланың туу туралы куәлігі;

3) алушы мен баланың тұрақты тұрғылықты тұратын жері бойынша тіркелгенін растайтын құжаттары;

4) Алматы қаласы Білім басқармасының қалалық психологиялық-медициналық-педагогикалық комиссиясы беретін Алматы қалалық психологиялық-медициналық-педагогикалық кеңес тұжырымы (бұдан әрі - Тұжырым);

5) мүгедектігі туралы анықтама;

6) банк шотының болуы туралы құжат.


Беттер: 1 2 »
 
     
   
 
   
Қазпошта сервиздері
 
 
 
 
 
 
Осы сайта жарияланған барлық материалдардың құқығы Алматы қаласының Әкімідігіне тиесілі.
© 2005-2017 Осы сайта жарияланған барлық материалдардың құқығы Алматы қаласының Әкімідігіне тиесілі.
Алматы қаласы әкімі Баспасөз қызметінің телефоны : +7 (727) 271-65-13